Apr 17 2025 | २०८२, वैशाख ४ गते
Apr 17 2025 | २०८२, वैशाख ४ गते
बारा । बारा जीतपुरसिमरा उपमहानगरपालिकाका नवनिर्वाचित नगर प्रमुख राजन पौडेलले न्याय सम्पादन हुने न्यायिक इजलाश कक्ष भत्काएर कार्यकक्ष बनाएका छन् ।
उपमहानगरमा रहेको नगर प्रमुखको कार्यकक्ष हुँदाहुँदै पौडेलले उक्त कक्षमा नबसेर इजलाश कक्ष हटाउँदै उक्त कोठालाई कार्यकक्ष बनाएका हुन् । इजलाश भत्काएर तयार गरिएको कार्यकक्षमै पौडेलले सोमबार बिहान पदभार ग्रहण गरेका थिए ।
नेपालको संविधान ०७२ धारा २१७ ले प्रत्येक स्थानीय तहमा उपप्रमुख वा उपाध्यक्ष संयोजक हुने गरी न्यायिक समिति हुने व्यवस्था गरेको छ । न्यायिक समितिले नगर क्षेत्रभित्रबाट परेका उजुरी र विवादमा छलफल गरी न्याय सम्पादन गर्नेगर्छ । जीतपुरसिमरामा पनि सोहीअनुसार करिब आठ लाख लागतमा न्यायिक इजलाश कक्ष निर्माण गरिइको थियो ।
उपमहानगरपालिकाकी निवर्तमान उपप्रमुख सरस्वतीदेवी चौधरीले उपप्रमुखको कार्यकक्षसँगै रहेको कोठामा न्यायिक इजलाश बनाएर न्याय सम्पादन गर्दै आएकी थिइन् ।समितिमा निर्वाचित नगरसभा सदस्यमध्ये दुई जना सदस्य, एक जना अधिवक्ता र कर्मचारी रहनेछन् ।
कक्ष भत्काएपछि तत्कालै न्याय सम्पादनको काम प्रभावित हुने भएको छ भने उपमहानगरको सभाहलमा सामान राखिएपछि बैठक तथा कार्यक्रम पनि नहुने भएका छन् । ज्योतिषको सल्लाहअनुसार न्यायिक कक्ष भत्काएको आरोप
कार्यकक्ष तयार गर्नुअघि पौडेलले ज्योतिषसँग सल्लाह लिएको र ज्योतिषले इजलाश कक्षनै उपयुक्त हुने सुझाएको जनाइएको छ । यसपछि ज्योतिषको सल्लाहअनुसार नागरिकले प्रत्यक्ष सेवा प्राप्त गर्ने इजलाश कक्षनै भत्काएर पौडेलले कार्यकक्ष बनाएको स्रोतको भनाइ छ ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
