सुभानु आचार्य

ललितपुर । ललितपुरमा स्वास्थ्यकर्मीहरुले स्वास्थ्य क्षेत्रको विषयमा गुनासो पोखेका छन् । नेपाल स्वास्थ्यकर्मी यूनियन जिल्ला कार्यसमिति ललितपुरको चौँथो जिल्ला अधिवेशन’ मा बोल्दै उनीहरुले स्वास्थ्य क्षेत्रको विकृतिको बारेमा मुख खोलेका हुन् । यूनियन केन्द्रीय अध्यक्ष उज्ज्वल कुमार शर्माले विगतमा आफूहरु पार्टी र टेड« यूनियनमा लाग्दा स्वास्थ्यकर्मीका लागि खासै काम नभएका गुनासो गरे । उनले विभिन्न पार्टीका साथै राजनीतिक दलमा नलाग्ने उद्घोषका साथ २०६२/०६३ सालको जनआन्दोलनपछि स्वतन्त्र रुपमा सो संस्था खडा गरी काम गरिरहेको बताए ।

यूनियन भक्तपुर जिल्ला अध्यक्ष मनोज मण्डलले पनि स्वस्थ्य क्षेत्र तथा स्वास्थ्यकर्मीको हकहितका लागि नेपालमा खासै काम नभएको गुनासो गरे । उनले भने, “कोरोना कहरका बेला राज्यले स्वास्थ्यकर्मीलाई दिने भनिएको सुविधा समेत हालसम्म सबैले पाउन सकेका छैनन् । यस अवस्थामा समेत स्वास्थ्यकर्मी खुशी भएर आफ्नो जिम्मेवारी निर्वाह गरिरहेका छन् ।”

यूनियनका अध्यक्ष मधुराम केसीले आफू ९ वर्ष सो संस्थाको पदमा रहँदा स्वास्थ्यकर्मीका थुप्रै समस्या समाधानका लागि विभिन्न व्यक्तिका साथै निकायलाई ध्यानाकर्षण गराएको बताए ।

सो यूनियन वरिष्ठ उपाध्यक्ष डिल्लीशेर केसीले मुलुकका स्थानीय तहका प्रमुख भूमिकामा रहेका जिम्मेवार व्यक्तिले स्वास्थ्यकर्मीलाई 'यो मेरो पार्टी वा म निकट हो या हैन' भनेर मुल्याङ्कन गरी व्यवहार गर्ने गरेका आरोप लगाए ।

नेपाल स्वास्थ्य प्राविधिक संघका अध्यक्ष हरीशरण थापाले यूनियनले स्वास्थ्यकर्मीका लागि महत्वपूर्ण भूमिका निर्वाह गर्नसक्ने बताउँदै भावि दिनमा राम्रोसँग अघि बढ्न सकोस भन्ने शुभकामना दिए ।

यूनियन वाग्मती प्रदेश संयोजक दिल कुमार दुवालले सो निकायका साथै सम्बिन्धत व्यक्ति र क्षेत्रबाट स्वास्थ्य क्षेत्रमा भएका समस्या समाधान गर्न गोलबद्ध भएर लाग्नुपर्ने धारणा राखे ।

ललितपुर ३ प्रतिनिधिसभाका सांसद डा. तोसिमा कार्कीले राज्यले हरेक स्वास्थ्यकर्मीलाई सुरक्षाकर्मी तवर तथा सरहको सम्मान दिनुपर्ने बताइन् । उनले स्वास्थ्यकर्मी भनेका मुलुकका हरेक व्यक्तिको स्वास्थ्य उपचारका साथै रेखदेख गर्ने पहरेदार रहेका बताइन् । 

स्वास्थ्य कार्यालय ललितपुरका प्रमुख डा. सतिश विष्टले स्वास्थ्यकर्मीले कोरोना महामारीका समयमा दिनरात नभनी थुप्रै काम गरेको प्रसंशा गर्दै उक्त निकायले मानिसमा पर्न सक्ने ठूलो क्षतिबाट जोगाएको जिकीर गरे । यूनियनले ललितपुरका सक्रिय स्वास्थ्यकर्मीहरुलाई सम्मान समेत गरेको छ ।