काठमाडौं उपत्यकाको मुटुमा रहेको कुमारीपाटी–जावलाखेल क्षेत्र सांस्कृतिक, आर्थिक र सामाजिक हिसाबले अत्यन्त महत्वपूर्ण ठाउँ हो । यहाँका व्यापारिक केन्द्रहरू, ऐतिहासिक सम्पदाहरू र जनजीवनको चहलपहललाई अझ उजागर गर्न कुमारीपाटी–जावलाखेल विकास संस्थाले कुमारीपाटी–जावलाखेल सडक महोत्सव २०८१ को आयोजना गर्दैछ । यो महोत्सव चैत्र २२ र २३ गते हुनेछ । 
यो महोत्सव एउटा विशेष अवसर हुनेछ । जहाँ सडक खाली गराई विभिन्न सांस्कृतिक कार्यक्रम, संगीत, परम्परागत खेलकुद, स्थानीय व्यवसाय प्रवद्र्धन र खानपानका स्टलहरू राखिनेछन् । यस महोत्सवले कला, संस्कृति र व्यापारिक गतिविधिहरूको साझा मंच बन्ने कुमारीपाटी जावलाखेल विकास संस्थाका उपाध्यक्ष विरेन्द्र शाक्यले अनलाइन पत्रिका बताए ।

सडक महोत्सव किन आवश्यक छ ?
कुमारीपाटी–जावलाखेल क्षेत्र व्यापारिक रूपमा चलायमान भएपनि यहाँको वातावरणलाई अझै जीवन्त बनाउनु आवश्यक छ । सडक महोत्सवले यस क्षेत्रमा कला, संस्कृति र व्यापारलाई एउटै ठाउँमा जोड्नेछ ।

स्थानीय व्यवसायको प्रवद्र्धन
महोत्सवमा स्थानीय व्यवसायीहरूलाई आफ्ना उत्पादन तथा सेवाहरू प्रदर्शन गर्ने अवसर मिल्नेछ । यसले आर्थिक गतिविधिलाई गति दिन्छ र उपभोक्ताहरूलाई गुणस्तरीय सामग्री खरिद गर्ने अवसर प्रदान गर्ने कुमारीपाटी क्लबका अध्यक्ष केशव खड्काले अनलाइन पत्रिकालाई बताए । 

सामाजिक एकता र पर्यटन प्रवद्र्धन
यस्तो महोत्सवले स्थानीय समुदायलाई अझ जोड्ने काम गर्छ । साथै, आन्तरिक तथा बाह्य पर्यटकहरूलाई आकर्षित गरी पर्यटन प्रवद्र्धनमा योगदान दिने विरेन्द्र श्रेष्ठले अनलाइन पत्रिकालाई जानकारी दिए ।  ।

सडकलाई सर्वसाधारणका लागि खुला गर्ने अभियान
काठमाडौं उपत्यकामा सवारी चाप बढ्दै गएको छ । यस्तो महोत्सवले कम्तीमा केही समयको लागि सडकलाई गाडीमुक्त गरी सर्वसाधारणका लागि खुला गर्ने अभ्यासलाई बढावा दिन्छ ।

महोत्सवमा के के रहनेछन् ?
✔ संगीत र सांस्कृतिक कार्यक्रम – स्थानीय कलाकारहरू, सांस्कृतिक समूहहरू, तथा युवा प्रतिभाहरूका प्रस्तुतिहरू ।
✔ स्थानीय हस्तकला तथा व्यापार स्टल – स्थानिय उत्पादनहरू, हस्तकला, तथा अन्य व्यापारिक प्रवद्र्धन ।
✔ फुड फेस्टिभल – परम्परागत तथा नयाँ परिकारहरूको स्टल, कफी तथा पेय पदार्थहरू ।
✔ बच्चा तथा परिवारमैत्री गतिविधिहरू – खेलकुद, चित्रकला, तथा अन्य मनोरञ्जनात्मक क्रियाकलाप ।
✔ यातायात रहित क्षेत्र – महोत्सव अवधिभर सडकलाई पैदल यात्रुहरूका लागि खुला गरिने ।

महोत्सवको प्रभाव
व्यापारिक गतिविधिमा वृद्धि
सांस्कृतिक संरक्षण र प्रवद्र्धन
स्थानीय अर्थतन्त्रमा सकारात्मक प्रभाव
शहरी जीवनशैलीमा सुधार
सहरी सौन्दर्यमा योगदान
कुमारीपाटी–जावलाखेल सडक महोत्सवको सफलताले काठमाडौंका अन्य ठाउँहरूमा पनि यस्ता गतिविधि आयोजना गर्ने प्रेरणा मिल्नेछ ।