काठमाडौँ । नेपाल मेडिकल कलेजले ओपिडी सेवा अनिश्तिकालका लागि बन्द गरेको छ । अस्पताल प्रशासनले आज एक सूचना जारी गर्दै बिरामीका आफन्तले अस्पतालमा तोडफोड गरेको भन्दै सेवा बन्द गर्ने निर्णय गरेको जनाएको हो ।
अस्पताल प्रशासनका अनुसार गोकर्णेश्वर नगरपालिकाका ७१ वर्षीय सुवर्ण कुमार धितालको विषयलाई लिएर उत्तेजित भिडले अस्पताल परिसरमा मंगलवार साँझ नाराजुलुस गरेको र अस्पतालमा कार्यरत चिकित्सक र कर्मचारीलाई अपशब्द प्रयोग गरि कुटपिट गरेको हो ।
प्रशासनले त्यसप्रकारको गतिविधिले अस्पतालको शान्ति सुरक्षामा बाधा परेको भन्दै नियमित अस्पताल सेवा संचालन हुन सक्ने अवस्था नरहेको जनाएको छ ।
अस्पताल प्रशासनले स्वास्थ्यकर्मी र स्वास्थ्य संस्थाको सुरक्षाको प्रत्याभूति नभएसम्म एमर्जेन्सीबाहेक सम्पूर्ण ओपिडी सेवा बन्द गर्ने निर्णय गरेको जनाएको छ ।
