आज सन्तानको आगमनसँगै म जत्तिको धनी मान्छे कोही छैन झै लागिरहेको छ । छोरालाई पुरुष मात्र नभएर असल मान्छे बनाउन सकुँ भन्ने मात्र लोभ छ अब ।

रिचा शर्मा

आज धेरै कुराहरु लेख्छु भनेर सोचिरहेको थिएँ । यो ९ महिनाको मनोवाद सब पोख्छु भनेर सोचिरहेको थिएँ । तर आज शब्दको अभाव महशुस भइरहेको छ । भावनालाई कसरी बुनुम भइरहेको छ । हिजोसम्म आफै केटाकेटी छु जस्तै लागिरहेको थियो । आज एकाएक परिपक्व भएको झै आभास भइरहेको छ । सोच्दापनि पृथ्वी बोके झै लाग्छ । आज मलाई आमा भन्ने कोही खासको आगमन भएको छ ।

अनेक कुराहरु मनमा खेलिरहेका छन् । उत्सुकता, अस्थिरता, हर्ष, पीर, डर, दृढ़ता, संकल्पहरुको बाढी मनभित्र चलिरहेको छ । पर्दामा अनेक भूमिका निभाउँदा निभाउँदै आज पर्दाबाहिर आमा बन्ने सौभाग्य पाउँदा, यो जतिको महत्वपूर्ण र न्यानो चरित्र सायद मैले कहिले निर्वाह गर्ने मौका पाएको थिइन् । जीवनमा आजसम्म के कति कमाएँ लेखाजोखा छैन, तर आमा झैँ माया गर्ने सासुआमा हुनुहुन्छ । बुबा झैँ आशिष दिने ससुरा बुबा हुनुहुन्छ । र, मनले मागेभन्दा बढी बुझिदिने दिने जीवनसाथी ।

आज सन्तानको आगमनसँगै म जत्तिको धनी मान्छे कोही छैन झै लागिरहेको छ । बाटो लामो छ । एउटा असल आमा जो एउटा दरिलो साथीपनि बन्न सकोस् र छोरालाई पुरुष मात्र नभएर असल मान्छे बनाउन सकुँ भन्ने मात्र लोभ छ अब । यो यात्रामा तपाईँहरु सम्पूर्ण शुभचिन्तकहरुको सधै झै माया, मार्गदर्शन, शुभेक्षा र आशिषको अपेक्षा गर्दछु । छोरा आभ्यान बिक्रम राणाको तर्फबाट तपाईँहरु सम्पूर्णलाई न्यानो माया ।