Jun 04 2026 | २०८३, जेठ २१ गते
Jun 04 2026 | २०८३, जेठ २१ गते
काठमाडौं । नेकपा (एमाले)निकट जनसंगठन प्रोग्रेसिभ इन्जिनियर्स एसोसिएसन नेपाल (पिन)ले संघीय निर्वाचनलाई लक्षित गर्दै देशभर ३९९ जना इन्जिनियरहरू निर्वाचन क्षेत्रस्तरमा जिम्मेवारीसहित परिचालन गरेको छ ।
संगठनका अनुसार संघीय निर्वाचनको सम्बन्धमा केन्द्रीय कमिटी बैठकले गरेको निर्णय, प्रदेश कमिटीहरूबाट प्राप्त सुझाव तथा अन्य विषयलाई मध्यनजर गर्दै संगठनको तर्फबाट संघीय निर्वाचनमा परिचालित हुने इन्जिनियरहरूको नाम छनोट गरिएको हो ।
परिचालित इन्जिनियरहरूलाई सम्बन्धित निर्वाचन क्षेत्रमा समन्वय, रणनीतिक सहयोग तथा प्राविधिक सल्लाह प्रदान गर्ने जिम्मेवारी दिइएको छ ।
सार्वजनिक तथ्यांकअनुसार सबैभन्दा धेरै इन्जिनियरहरू बागमती प्रदेशमा (१३४ जना) रहेका छन् । संघीय राजधानी क्षेत्र तथा केन्द्रीय संरचनाहरू केन्द्रित भएकाले बागमतीमा प्राविधिक जनशक्तिको उपस्थिति उल्लेखनीय देखिएको हो ।
त्यसैगरी लुम्बिनी प्रदेशमा ७० जना र कोशी प्रदेशमा ६७ जना इन्जिनियरहरू परिचालित छन् । गण्डकी प्रदेशमा ४८ जना, मधेश प्रदेशमा ४३ जना तथा कर्णाली प्रदेशमा ३१ जना इन्जिनियरहरू जिम्मेवारीसहित खटिएका छन् ।
सबैभन्दा कम संख्या सुदूरपश्चिम प्रदेशमा ६ जना रहेको छ । प्रदेशगत वितरण हेर्दा संघीय संरचनाअनुसार सन्तुलन कायम गर्ने प्रयास गरिएको देखिन्छ ।
कोशी प्रदेशअन्तर्गत झापा–५ निर्वाचन क्षेत्रमा ४ जना इन्जिनियरहरू प्रत्यक्ष जिम्मेवारीमा रहेका छन्, जसले प्रतिस्पर्धात्मक निर्वाचन क्षेत्रहरूमा प्राविधिक उपस्थिति सुदृढ बनाइएको संकेत गर्दछ ।
पीनका अनुसार निर्वाचन परिचालनमा छनोट भएका इन्जिनियरहरूले एमालेले गठन गरेको निर्वाचन क्षेत्रस्तरीय निर्वाचन परिचालन समितिसँग समन्वय गर्ने, निर्वाचन परिचालन समितिलाई घोषणा–पत्र निर्माण, प्रचार रणनीति तथा सामग्री तयारी, तथ्यांक विश्लेषण जस्ता कार्यमा सल्लाह–सुझाव दिने तथा आवश्यक कार्य सम्पादन गर्नेछन् ।
साथै निर्वाचन अन्य आवश्यक गतिविधिहरूमा समेत सहकार्य गरिने पीनका अध्यक्ष ई. डा. भेषराज थापाले बताए ।
संगठनले इन्जिनियरहरूको यो परिचालनले निर्वाचन अभियानलाई तथ्य–आधारित, व्यवस्थित र प्रभावकारी बनाउन सहयोग पुग्ने विश्वास व्यक्त गरेको छ ।
विकाससम्बन्धी उपलब्धि प्रस्तुति, पूर्वाधार योजनाको विश्लेषण तथा डाटा व्यवस्थापनमा प्राविधिक जनशक्तिको सक्रियता रहने पीनले जनाएको छ ।
समग्रमा ३९९ जना इन्जिनियरहरूको देशव्यापी परिचालनलाई एमालेको निर्वाचन रणनीतिमा प्राविधिक आयाम थप्ने कदमका रूपमा हेरिएको छ ।
© 2026 All right reserved to onlinepatrika.com | Site By : Sobij
© 2026 All right reserved to onlinepatrika.com | Site By : Sobij
