Apr 04 2025 | २०८१, चैत २२ गते
Apr 04 2025 | २०८१, चैत २२ गते
काठमाडौं । लामो समयपछि बसेको सत्तारूढ दल नेकपाको सचिवालय बैठक कुनै ठोस निर्णय नगरी स्थगित भएको छ । शुक्रबार साँझ ४ः३० बजेपछि प्रधानमन्त्रीको सरकारी निवास बालुवाटारमा बसेको बैठक मंसिर ३ गतेसम्मका लागि स्थगित भएको प्रवक्ता नारायणकाजी श्रेष्ठले जानकारी दिए । बैठकले आगामी बैठकका लागि एजेण्डासमेत तय गरेको छ । मुख्यतः पार्टीमा देखिएको संकट र त्यसको समाधानलाई केन्द्रमा राखेर छलफल गरिने तय भएको प्रवक्ता श्रेष्ठले जानकारी दिए ।
प्रवक्ता श्रेष्ठका अनुसार बैठकमा कार्यकारी अध्यक्ष प्रचण्डसहित सचिवालयका बहुमत सदस्यले बुझाएको पत्र र त्यसको जवाफमा प्रधानमन्त्री एवं अध्यक्ष केपी शर्मा ओलीले बुझाएको पत्र सचिवालय सदस्यलाई वितरण गरिएको थियो । त्यसबाहेक ती सबैलाई समेटेर अध्यक्ष प्रचण्डले बैठकका लागि तयार पारेको एजेण्डासहितको प्रतिवेदन पनि पेस भएको थियो । प्रवक्ता श्रेष्ठका अनुसार यी सबै अध्ययन गरेर मंसिर ३ गते बैठक बस्ने निर्णय भएको हो । कात्तिक २२ मा अध्यक्ष प्रचण्डसहित वरिष्ठ नेता झलनाथ खनाल, माधवकुमार नेपाल, उपाध्यक्ष वामदेव गौतम र प्रवक्ता श्रेष्ठले बैठकको आग्रह गर्दै प्रधानमन्त्री ओलीलाई दुई पेज लामो पत्र बुझाएका थिए । त्यसको जवाफमा प्रधानमन्त्री ओलीले अध्यक्ष दाहाललाई सम्बोधन र अन्य चार नेतालाई बोधार्थसहितको पत्र लेखेका थिए ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
