काठमाडौँ । नेपाल वायुसेवा निगम र नेपाल पर्यटन बोर्डबीच पर्यटन प्रवर्द्धनका लागि सम्झौतापत्रमा हस्ताक्षर भएको छ ।

मंगलबार नेपाल वायुसेवा निगम र नेपाल पर्यटन बोर्डबीच पर्यटन प्रवर्द्धन तथा हवाई सेवामा सहकार्यसम्बन्धी सम्झौतापत्रमा हस्ताक्षर भएको हो । सम्झौतापत्रमा निगमका तर्फबाट कार्यकारी सञ्चालक अमृतमान श्रेष्ठ र नेपाल पर्यटन बोर्डका तर्फबाट प्रमुख कार्यकारी अधिकृत दीपकराज जोशीले हस्ताक्षर गरेका छन् ।

निगमको केन्द्रीय कार्यालय,न्युरोडमा आयोजित विशेष समारोहमा दुवै संस्थाका उच्च अधिकारीहरूको उपस्थितिमा सम्झौता सम्पन्न भएको हो । यस अवसरमा दुवै पक्षबाट पर्यटन र हवाई सेवालाई राष्ट्रिय विकासको महत्वपूर्ण आधार मान्दै सहकार्यलाई दीर्घकालीन रूपमा अघि बढाउने प्रतिबद्धता व्यक्त गरिएको छ ।

दुवै पक्षवाट पर्यटन र हवाई सेवालाई राष्ट्रिय विकासको महत्वपूर्ण आधार मान्दै सहकार्यलाई दीर्घकालीन रूपमा अघि बढाउने प्रतिबद्धता व्यक्त गरिएको छ ।

सम्झौतामा नेपाल वायुसेवा निगम र पर्यटन बोर्डले एक आपसमा आ-आफ्नो क्षेत्रीय तथा अन्तर्राष्ट्रिय मञ्चहरूमा सहकार्य गर्ने प्रावधान राखिएको छ। सम्झौताअनुसार पर्यटन प्रवर्द्धन कार्यका लागि यात्रा गर्दा वा त्यस्ता कार्यक्रममा सहभागिताका लागि जाने पदाधिकारी तथा कर्मचारीहरूलाई निगमका गन्तव्यहरूमा विशेष छुटमा हवाई टिकट उपलब्ध गराइनेछ। त्यस्तै, नेपाल पर्यटन बोर्डले आयोजना गर्ने देशभित्र र विदेशमा हुने प्रवर्द्धनात्मक कार्यक्रमहरूमा नेपाल वायुसेवा निगमलाई स्टल उपलब्ध गराउने छ । दुवै संस्थाले आपसी ब्रान्ड प्रमोशन, बजार अभिमुखीकरण परिचयात्मक भ्रमण र संस्थागत साझेदारीलाई अझ प्रभावकारी बनाउने उद्देश्यका साथ संयुक्त गतिविधि सञ्चालन गर्ने सहमति भएको छ ।

दुवै निकायबीच भएको यो सहकार्यले नेपालको पर्यटन क्षेत्रलाई नयाँ ऊर्जा प्रदान गर्ने विश्वास गरिएको छ राष्ट्रिय ध्वजावाहक विमान सेवाका रूपमा नेपाल वायुसेवा निगमले अन्तर्राष्ट्रिय क्षेत्रमा नेपालको पहुँच र विश्वसनीयता मजबुत पार्दै आएको छ भने पर्यटन बोर्डले नेपाललाई विश्व बजारमा आकर्षक गन्तव्यका रूपमा परिचित गराउन निरन्तर काम गर्दै आएको छ दुवै संस्थाले आफ्नो आफ्नो दक्षता र संयोजनबाट पर्यटन प्रवर्द्धन, यात्रु वृद्धि, बजार विस्तार, गन्तव्य विविधीकरण र नेपाल मैत्री अन्तर्राष्ट्रिय छवि निर्माणमा महत्वपूर्ण योगदान पुग्ने आशा व्यक्त गरिएको छ ।