येँ, १४ दिल्लागा : सामाजिक सुरक्षा कोषं योगदानय् आधारित सामाजिक सुरक्षा योजनाय् स्वानाच्वंपिं श्रमिक व श्रमिकतय् छेँजःपिनिगु स्वास्थ्यया भाला कायेगु घोषणा याःगु दु । कोषय् थौं ग्वसाःग्वःगु पत्रकार सम्मेलनय् कार्यकारी निर्देशक कविराज अधिकारीं थौं नं थ्यंमथ्यं प्यदँया दुने श्रमिक व छेँजःतय् स्वास्थ्यया भाला कोषपाखें राज्यं कायेगु कथं ज्या जुयाच्वंगु ध्वाथुइकादिल । लिपांगु इलय् योगदानकर्तातय् स्वास्थ्योपचारसम्बन्धी सुविधायात तब्याकाः यंकूगु जानकारी बियादिसें कार्यकारी निर्देशक अधिकारीं औपचारिक ख्यःया श्रमिकतय् छेँजःपिनिगु स्वास्थ्य सेवा तब्यानाः न्ह्यानाच्वंगु आर्थिक दँय् कार्यान्वयनय् वयेधुंकूगु धयादिल ।
“थौं स्वयां न्यादँ न्ह्यः योगदानकर्तातय्के जक सिमित जुयाच्वंगु स्वास्थ्य उपचार सेवा आः योगदानकर्तातय् छेँजःपिनित तकं थ्यनेधुंकूगु दु”, वय्कलं धयादिल, “वासः यायेगु छगू लखया सीमायात योगदानकर्तातय् हकय् अस्पतालय् भर्ना जुयाः उपचार याकेमाःगु जूसा १० लख तकया उपचार खर्चय् ५० प्रतिशत सहभुक्तानी सुविधा तकं उपलब्ध याकूगु दु ।” लिपांगु दँय् रोजगारदाता व योगदानकर्तातय् धलखय् दुथ्याकेगु व योगदान ध्यबा सङ्कलनय् खनेदयेक वृद्धि जूगु कनादिसें कार्यकारी निर्देशक अधिकारीं वैदेशिक रोजगारीइ वनाच्वंपिं श्रमिकतपाखें जुइगु योगदान ध्यबाया नियमितताया निंतिं कुतः जुयाच्वंगु धयादिल । वंगु आर्थिक दँतक कोषय् २० द्वः व ९९१ रोजगारदाता व २३ लख ७४ द्वः व ४८६ योगदानकर्तात आबद्ध जूगु खः ।
उगु आर्थिक दँय् जक हे च्यागू लख ८२ द्वः ९ सः व ४६ श्रमिक कोषय् आबद्ध जूगु खः । उगु इलय् ८३ अर्ब ६५ क्वति थ्यंगु कोषं धाःगु दु । नियमित योगदान बियाच्वंपिं योगदानकर्तातय्त थी थी सामाजिक सुरक्षा योजनाया उपयोग याःगुलिं १५ अर्व ७५ क्वति ध्यबा भुक्तानी जूगु कोषं धाःगु दु । विशेष सापटी ६ अर्ब ९० क्वति, छेँ सापटी १३ क्वति व शैक्षिक सापटी १ क्वति यानाः मुक्कं ३४ द्वः व ९७ योगदानकर्तातय्त ७ अर्व ४ क्वति भुक्तानी जुइधुंकूगु कोषया प्रवक्ता कृष्ण अधिकारीं जानकारी बियादिल ।
