काठमाडौँ । संघीय संसदअन्तर्गतका विभिन्न संसदीय समितिले आइतबार बैठक बोलाएका छन् । निर्वाचित सभापति पाएपछि समितिले बैठक बोलाएका हुन् । सिंहदरबारस्थित समितिको सभा कक्षमा आज बिहान ११ बजे महिला तथा सामाजिक मामिला समितिको बैठक बस्दैछ ।
समिति सचिवालयले बैठकमा महिला बालबालिका तथा ज्येष्ठ नागरिक मन्त्रालयको प्रस्तुति लगायतका विषयमा छलफल हुने जनाएको छ । यस्तै कृषि सहकारी तथा प्राकृतिक स्रोत समितिको बैठक बिहान साढे ११ बजे बस्दैछ ।
समिति सचिवालयका अनुसार समितिको सभाकक्ष सिंहदरबारमा बस्ने बैठकमा समितिको हालसम्मको कार्यप्रगति, निर्णय तथा निर्देशन र समितिमा छलफल गर्नुपर्ने विभिन्न महत्त्वपूर्ण विषयको प्रस्तुति लगायतका विषयमा छलफल हुनेछ ।
त्यस्तै राष्ट्रियसभा अन्तर्गतको दिगो विकास तथा सुशासन समितिको बैठक पनि बिहान ११ बजे बस्ने तय भएको छ । सिंहदरबारस्थित समितिको सभाहलमा सो बैठक बस्नेछ।
