१६ जना क्रियाशील सदस्यको नाम हटाएर जयवीरसहित १० जनाको नाम थपेर मतदाता नामावली सार्वजनिक गरिएपछि कार्यालयमै कार्यकर्ताबीच कुटाकुट भएको हो ।

काठमाडौं । प्रधानमन्त्रीसमेत रहेका नेपाली कांग्रेसका सभापति शेरबहादुर देउवाका छोरा जयवीरसिंह देउवाले राजनीतिमा ‘डेब्यु’ गरेका छन् । जयवीरले यसपालि डडेल्धुराको गन्यापधुरा गाउँपालिका–१ बाट सदस्यता लिएका छन् । नयाँ क्रियाशील सदस्यता सूचीको १६६ नम्बरमा जयवीरको नाम छ । 
देउवाका एक्ला सन्तान जयवीर राजनीतिमा आएसँगै जिल्लामा भने कार्यकताबीच कुटाकुट हुन थालेको छ । 

१६ जना क्रियाशील सदस्यको नाम हटाएर जयवीरसहित १० जनाको नाम थपेर मतदाता नामावली सार्वजनिक गरिएपछि अरु नेता तथा कार्यकर्ता आक्रोशित छन् । नामावली सार्वजनिक भएपछि विवाद उत्कर्षमा पुग्दै कार्यकर्ताबीच कुटाकुट भएको छ । जिल्ला कार्यसमिति बैठकमा विवाद हुँदा कार्यालयमै कार्यकर्ताबीच कुटाकुट भएको हो । सातौँ जिल्ला अधिवेशनका लागि डडेल्धुरामा खटिएका निर्वाचन अधिकृत लोकेन्द्रबहादुर बमले बैठक पुस्तिकामा हस्ताक्षर नगरेपछि सुरु भएको विवाद अन्ततः कुटाकुटमा परिणत भएको हो ।