Sep 02 2025 | २०८२, भदौ १७ गते
Sep 02 2025 | २०८२, भदौ १७ गते
येँ, ११ दिल्लागा स् संस्कृति, पर्यटन नापं नागरिक उड्डयनमन्त्री बद्रीप्रसाद पाण्डें नेपाः थी थी जातजाति, भाषा, भेषभूषा, परम्परा व संस्कारं जाःगु देय् जूगुलिं थुकियात सांस्कृतिक अध्ययनया अद्वितीय सङ्ग्रहालयकथं विकास यायेमाःगु धयादीगु दु ।
म्ये हालामि अरुण थापामगरया २६ क्वःगु स्मृति दिवसया झ्वलय् नेपाल मगर विद्यार्थी सङ्घ केन्द्रीय समितिं थौं ‘स्रष्टा सम्मान तथा बृहत सांस्कृतिक कार्यक्रम’य् मन्त्री पाण्डें नेपाः थःथवं जीवित सांस्कृतिक सङ्ग्रहालय जूगु न्ह्यथनादिसें थुकिया संरक्षण व प्रवद्र्धन यायेगु झीगु हे दायित्व जूगु धयादिल । समुदायस्तरय् सञ्चालन जुइगु थुजाःगु सांस्कृतिक ज्याझ्वलं नेपालीपनया भावनायात अझ सुदृढ याइगु वय्कलं धारणा प्वंकादिल ।
सङ्घया केन्द्रीय नायः चन्द्रबहादुर थापां मगर समुदायतय् सांस्कृतिक चेतना अभिवृद्धिइ सङ्घ क्रियाशील जुयाच्वंगु जानकारी बियादिल । लिसें, स्व थापामगरं मगर समुदाय जक मखु मुक्कं नेपाःया सङ्गीत ख्यलय् हे बियादीगु योगदान ल्वःमंकेमफइगु न्ह्यथनादिसें वय्कःया स्मृति लिपाया पुस्तातय् निंतिं प्रेरणाया स्रोत जुइगु धयादिल ।
ज्याझ्वलय् थी थी साहित्य, सङ्गीत, प्याखं व कला ख्यलय् योगदान बियादीपिंत ‘स्रष्टा सम्मान’ लःल्हाःगु खः । लिसें, मगर समुदायतय् मौलिक प्याखं, म्ये व सांस्कृतिक ज्याझ्वः नं न्ह्यब्वःगु खः ।
–––
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
