मासुजन्य परिकारमा शरीरका लागि आवश्यक प्रोटिन प्रशस्त हुने भएपनि धेरै मासु खानु शरीरका लागि हानीकारक हुने पोषणविद् अरुणा उप्रेतीको भनाइ छ ।

नेपालीको घर घरमा दसैं भित्रिसकेको छ । दसैंमा सबैभन्दा धेरै मासु कै परिकार पाक्छन् । यहीकारण दसैंमा मासुको खपत अत्याधिक हुने गर्छ । सामान्य समयभन्दा यो समयमा झण्डै १० गुना बढी मासु खपत हुने अनुमान छ । विशेषत फुलपातीको दिन ल्याएको मासु दसैंभरि लगाएर खाने चलन छ । तर, यसरी सेवन गरिने मासु स्वास्थ्यका लागि भने फाइदाजनक हुँदैन । 

फुलपातीको दिन पकाएको मासु भुटेर, फ्रिजमा राखेर अनेक विधि अपनाएर स्टक गरिन्छ, तर यसरी राखिएका मासु स्वास्थका दृष्टिकोणले अस्वस्थ साबित हुन्छ । मासुजन्य परिकारमा शरीरका लागि आवश्यक प्रोटिन प्रशस्त हुने भएपनि धेरै मासु खानु शरीरका लागि हानीकारक हुने पोषणविद् अरुणा उप्रेतीको भनाइ छ । एकजना व्यक्तिले प्रतिदिन एक सय ग्रामसम्म मासु सेवन गर्नुपर्छ । 

मासुसँगै दसैंको समयमा मद्यपान गर्दा यो झनै हानिकारक हुन्छ । अझ मासु पकाउँदा आगोमा पोलेर, तारेर पकाउँदा यस्तो खान्कीले मधुमेह, उच्च रक्तचाप तथा क्यान्सर गराउने तत्व शरीरमा उत्पादन गराउन मद्दत पुर्याउँछ । साथै, पाचनप्रणालीमा समेत यसले गम्भीर असर पुर्याउन सक्छ । 

स्वस्थ मासु कसरी चिन्ने ?
– मासुका लागि पशुपछी खरिद गर्दा स्वस्थ पशुपंछी छान्ने । 
– धेरै मासु एकैपटक नकिन्ने, आवश्यकताअनुसार किन्ने ।
– फ्रिजमा ताजा मासुलाई ४८ घण्टासम्म मात्र राख्ने । 
– फ्रिजमा मासु राख्दा छोपेर राख्ने । 
– मासुलाई टुक्रा–टुक्रा बनाएर फ्रिजमा माइनस १८ देखि ३० डिग्री सेल्सियससम्मको तापक्रममा राख्ने ।
– मासुमा अम्लियपनाको मात्रा ५।७ पीएचभन्दा कम र ६।३ पीएचभन्दा बढी हुनुहुँदैन ।
– मासु सकेसम्म ७२ डिग्री सेल्सियस तापक्रममा पकाउने ।