ज्यापू समाजका अध्यक्ष चन्द्र महर्जनका अनुसार सो भवन १४ करोड रुपैयाँको लागतमा तयार भएको हो । १ रोपनी १३ आना क्षेत्रफलमा बनाइएको भवन तयार गर्न करिब १० वर्ष लागेको थियो ।

ललितपुर । प्रधानमन्त्री शेरबहादुर देउवाले बागडोलमा नवनिर्मित ज्यापु समाज ज्येष्ठ नागरिक आनन्द निकेतन भवनको उद्घाटन गरेका छन् । वृद्धाश्रमको उद्धघाटन गर्दै प्रधानमन्त्री देउवाले भने, 'ज्येष्ठ नागरिकहरूलाई राज्यले सम्मान गर्छ । उहाँहरूको सम्मानका लागि राज्यका तर्फबाट गर्नुपर्ने अन्य सहयोगका लागि सरकार प्रतिबद्ध छ ।'

गृहमन्त्री बालकृष्ण खाँणले ज्येष्ठ नागरिकको सुरक्षाका लागि भवन निर्माण हुँदा मुलुकका धेरै मानिसलाई ऊर्जा प्राप्त भएको बताए ।

यस्तै ऊर्जा, जलस्रोत तथा सिँचाईमन्त्री पम्फा भुसालले पवित्र उद्देश्यका साथ वृद्धवृद्धाको सेवामा सुविधायुक्त आश्रयस्थल निर्माण गरी ज्यापु समाजले राष्ट्रिय भूमिका निर्वाह गरेको बताइन् ।

वागमती प्रदेशका मुख्यमन्त्री अष्टलक्ष्मी शाक्यले जीवित इतिहासका धरोहर ज्येष्ठ नागरिकले भवनबाट राम्रो सुविधा पाउने अपेक्षाका साथ प्रदेशले भवन निर्माणमा रु दुई करोड ९१ लाख सहयोग गरेको जानकारी दिइन् ।

नेपालका लागि भारतीय राजदूत विनयमोहन क्वात्राले उमेर ढल्किएका नागरिकलाई छिमेकी मुलुकका तर्फबाट ज्येष्ठ नागरिक भवन निर्माणमा रु पाँच करोड सहयोग गर्न पाउँदा निकै भाग्यमानी महसुस भएको बताए ।

ललितपुर महानगरपालिकाका प्रमुख चिरीबाबु महर्जनले समाजको भवन र यहाँ रहने वृद्धवृद्धाहरुको व्यवस्थापन गर्न आर्थिक चुनौती रहँदा सबैले सहयोग गर्ने अपेक्षा लिएको धारणा राखे । 

ज्यापू समाजका अध्यक्ष चन्द्र महर्जनका अनुसार सो भवन १४ करोड रुपैयाँको लागतमा तयार भएको हो । १ रोपनी १३ आना क्षेत्रफलमा बनाइएको भवन तयार गर्न करिब १० वर्ष लागेको थियो । स्वर्गीय अष्टमान महर्जनले भवन बनाउन जग्गा दान गर्नुभएको थियो । पाँच तल्ले सो भवन मौलिक कलात्मक शैलीमा बनाइएको छ । स्वर्गीय अष्टमान महर्जनले भवन बनाउनको लागि जग्गा दान दिनुभएको थियो ।

समाजका वरिष्ठ उपाध्यक्ष सन्तमान महर्जनका अनुसार भवन बनाउन भारत सरकारले पाँच करोड रुपैयाँ, वाग्मती प्रदेश सरकारले २ करोड ९१ लख ६१ हजार ३ सय ५५ रुपैयाँ, ललितपुर महानगरपालिकाले ३ करोड १४ लाख ८२ हजार ७ सय रुपैयाँ, संविधानसभा सदस्यको सांसद् विकास कोषबाट १८ लाख ३६ हजार ९ सय १८ रुपैयाँ, पम्फा भुसालको सांसद् विकास कोषबाट १४ लाख ६३ हजार ८ सय ३५ रुपैयाँ,रामकाजी अवालेले ८ लाख ५५ हजार ५ सय ५५ रुपैयाँ, किसलाल महर्जनले ५ लाख ५५ हजार ५ सय ५५ रुपैयाँ सहयोग गर्नुभएको थियो ।