काठमाडौं । काठमाडौं महानगरपालिका–२६ पवित्रनगरस्थित एमाउन्ट धौलागिरी ग्यारेजबाट ११ ग्राम अवैध लागूऔषध ब्राउनसुगर, नगद ७३ हजार रुपैयाँ, २ थान डिजिटल तौल मसिन, १ थान मोटरसाइकल र ४ थान मोबाइल सहित काठमाडौं बनस्थली बस्ने गोरखा भिमसेन गाउँपालिका –७ घर भएका ३० वर्षीय राजु ढकाल लगायत ४ जनालाई  प्रहरीले पक्राउ गरेको छ । उक्त ग्यारेजमा लागूऔषधको कारोबार भइरहेको भन्ने विशेष सूचनाका आधारमा महानगरीय अपराध महाशाखा र महानगरीय प्रहरी प्रभाग गोगबुबाट खटिएको प्रहरीले उक्त ब्राउनसुगर सहित फेला पारी उनीहरुलाई पक्राउ गरेको हो । काठमाडौं महानगरपालिका–३२ सुविधानगरबाट २ सय ७० चक्की नियन्त्रित लागूऔषध नाइट्राभेट सहित भक्तपुर दुवाकोट डेरा गरी बस्ने काभ्रे कालढुङगा घर भएका २५ वर्षीय जिवन बोलखेलाई बिहीबार बेलुका प्रहरीले पक्राउ गरेको छ । लागूऔषध बिक्री गरिरहेको भन्ने सूचनाको आधारमा महानगरीय प्रहरी वृत्त नयाँ बानेश्वरबाट खटिएको प्रहरीले उनलाई उक्त लागूऔषध सहित फेला पारी पक्राउ गरेको छ ।

झापा, झापाको बिभिन्न स्थानबाट ४८ ग्राम ५ मिलीग्राम अवैध लागूऔषध ब्राउनसुगर सहित २ जनालाई बिहीबार प्रहरीले पक्राउ गरेको छ । पक्राउ पर्नेहरुमा अर्जुनधारा नगरपालिका–६ बस्ने २५ वर्षीय आशिष थापा र बुद्धशान्ति गाउँपालिका–२ बस्ने २२ वर्षीय प्रिन्स खनाल रहेका छन् ।बिशेष सूचनाको आधारमा लागूऔषध नियन्त्रण व्यूरो काकडभिट्टा र ईलाका प्रहरी कार्यालय अनारमनीबाट खटिएको प्रहरीले झापा बिर्तामोड नगरपालिका–५ बिहानी टोलबाट प्र.१.०१.०१३ प २७०१ नम्बरको मोटरसाइकल र ९ ग्राम ५ मिलीग्राम ब्राउनसुगर सहित थापा र अर्जुनधारा नगरपालिका–९ प्रणामी मन्दिर नजिकबाट मे.५ प ९२५६ नम्बरको मोटरसाईकल र ३९ ग्राम ब्राउनसगुर सहित खनाललाई पक्राउ गरेको हो । उनीहरु उपर आवश्यक अनुसन्धान भइरहेको जिल्ला प्रहरी कार्यालय झापाले जनाएको छ ।