काठमाडौँ: सहकारी ठगी प्रकरणमा तीन महिना भन्दा लामो समय थुनामा रहेका छविलाल जोशीको बयान लिने क्रम जारी छ। कास्की जिल्ला अदालतमा जोशीको बयान लिने क्रम मंगलबार पनि जारी रहेको हो। सोमबार उनको बयान नसकिएपछि मंगलबार पनि बयान लिने क्रम जारी छ।

उनको बयान सकिएपछि सोही मुद्दामा प्रहरी थुनामा रहेका राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेको बयान लिने अदालतको तयारी छ। तर छविको बयान नै नसकिएको हुनाले रविको बयानका लागि समय हुनेरनहुने निश्चित भएको छैन। बयानका लागि भन्दै रविसमेतलाई अदालत उपस्थित गराइएको छ। बयानपछि थुनछेक बहस हुनेछ।

बयानका लागि सोमबार नै रविलाई अदालत लगिए पनि उनको पालो आएन। सम्पत्ति शुद्धिकरण मुद्दा अदालतमा दायर भएपछि उनी सोमबार साँझ सांसद पदबाट निलम्बित भएका छन्। थुनछेकको बहस सकिएपछि उनलाई पुपर्क्षका लागि थुनामा पठाउने वा धरौटीमा छाड्ने भन्ने कास्की जिल्ला अदालतले आदेश दिनेछ। सरकारी वकिलको कार्यालय कास्कीले लामिछाने, छविलाल जोशीसहित ४४ जनालाई आइतबार सहकारी ठगीको आरोपमा प्रतिवादी बनाएर मुद्दा दर्ता गरिसकेको छ। पाँच जनालाई बिगो अनुसारको सम्पत्ति जफत गर्ने प्रयोजनका लागि मात्र प्रतिवादी कायम गरिएको छ ।

पूर्व डीआईजी छविलाल जोशी पक्राउ परेको दिनदेखि ९२औँ दिनमा सरकारले आइतबार अभियोगपत्र दर्ता गरेको हो ।लामिछानेविरुद्ध भने तीन वटा कसुरमा मुद्दा दर्ता भएको छ । लामिछानेविरुद्ध सङ्गठित अपराध, सहकारी ठगी र सम्पत्ति शुद्धीकरण सम्बन्धी कसुरमा अभियोग पत्र दर्ता गरिएको छ । गोर्खा मिडियाका अध्यक्ष जीबी राई सहित १९ जनाविरुद्ध पूरक अभियोग पत्र पनि दर्ता भएको छ।

रवि लामिछाने र जीवी राई सहितको समूहले सूर्यदर्शन सहकारीबाट १ अर्ब ५१ करोड अपचलन गरेको प्रहरीको अनुसन्धान निष्कर्ष छ । सूर्यदर्शनको ५ करोड ४८ लाख निक्षेप गोरखा मिडिया नेटवर्क प्रालिमा लगेर अपचलन गरेको भेटिएको प्रहरीको दाबी छ । लामिछाने गत कात्तिक २ गते काठमाडौँस्थित रास्वपाको केन्द्रीय कार्यालयबाट पक्राउ परेका थिए। उनीविरुद्ध सहकारी ठगी प्रकरणमा रुपन्देही, चितवन, काठमाडौँ तथा पर्सामा पनि मुद्दा चलिरहेको छ।