
Apr 03 2025 | २०८१, चैत २१ गते
काठमाडौं । देशभरका उद्योगीव्यवसायीहरुको छाता संस्था नेपाल उद्योग वाणिज्य महासंघको ५४औं साधारण सभा बिहीवारबाट सुरु भएको छ भने नयाँ नेतृत्वका लागि शनिवार निर्वाचन हुँदैछ । यसपटक बरिष्ठ उपाध्यक्ष पदका लागि चन्द्रप्रसाद ढकाल र किशोर प्रधान प्यानल नै बनाएर प्रतिस्पर्धामा उत्रिएका छन् । यतिबेला महासंघको निर्वाचनले फिल्मकर्मीको पनि ध्यान आकर्षित गरेको छ ।
यसपटक उद्योग वाणिज्य महासंघको निर्वाचनमा वर्षौंदेखि नेपाली फिल्म क्षेत्रको हक हितका लागि लड्दै आएका दुई फिल्मकर्मीले उम्मेदवारी घोषणा गरेका छन् । चन्द्रप्रसाद ढकालको प्यानलबाट वस्तुगततर्फ कार्यसमिति सदस्यमा निर्देशक आकाश अधिकारी र किशोर प्रधानको प्यानलबाट वस्तुगततर्फ कार्यसमिति सदस्यमा निर्देशक अशोक शर्माले उम्मेदवारी घोषणा गरेका छन् ।
आकाश अधिकारीले अघिल्लो निर्वाचनमा वस्तुगततर्फ कार्यसमिति सदस्यमा जित हासिल गरेका थिए । अशोक शर्माले पनि महासंघमा आफ्नो प्रतिनिधित्व जनाइसकेका छन् । दुवैले आफू र आफ्नो प्यानललाई जिताउन राम्रै कसरत गरिरहेका छन् । फिल्म क्षेत्रको प्रतिनिधित्व गर्दै महासंघको निर्वाचनमा होमिएका कारण उनीहरुलाई फिल्मकर्मीहरुले पनि साथ दिएका छन् ।
आकाश अधिकारीले महासंघको कार्यसमिति सदस्यमा उम्मेदवारी घोषणा गर्दै फिल्म क्षेत्र र उद्योग बाणिज्य महासंघको साथले फिल्म क्षेत्र राष्ट्रिय मान्यता प्राप्त उद्योगमा आएको र अब नीति, नियम र कानुन लेख्न आफू फेरि उद्योग वाणिज्य महासंघमा जान लागेको बताएका छन् । त्यस्तै, अशोक शर्माले कलाकर्मीको सम्मान, फिल्म क्षेत्रको विकासका एजेण्डा अगाडि सारेका छन् ।
फिल्म क्षेत्रका समस्या उद्योग वाणिज्य महासंघबाट सरकारसम्म पुर्याउन आफूले पहल गर्ने निर्देशक शर्माको भनाई छ । उनले भनेका छन्, ‘अहिले फिल्म निर्माणमा ठूलो लगानी छ । तर, त्यसको सुरक्षाको ग्यारेन्टी छैन । सिनेमा हलहरु बन्द हुँदै गएका छन् । यसलाई पुनः स्थापित गर्नु अहिलेको ठूलो चुनौती हो । यी कुराहरु हामी महासंघबाट सरकारको कानसम्म पुर्याउन सक्छौं ।’
त्यस्तै, कलाकार समेत रहेका आकाश अधिकारीले नेपाली फिल्म अन्तर्राष्ट्रिय स्तरको बनाउन र अन्तर्राष्ट्रिय स्तरमा नेपाली फिल्मलाई पुर्याउन आफूले उद्योग वाणिज्य महासंघबाट पहल गर्ने प्रतिवद्धता व्यक्त गरेका छन् । आफूले महासंघको चार वर्षे कार्यकालमा धेरै सिक्न पाएको र नेपाली फिल्म इन्डस्ट्री र उद्योग(व्यवसायलाई मिलाउने ब्रिजको काम गरेको उनको भनाई छ ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij