काठमाडौं । नेपाल मोबाइल वितरक संघले तत्काल मोबाइल डिभाइस म्यानेजमेन्ट सिस्टम (MDMS) लागू गर्न नेपाल सरकार तथा सम्बन्धित निकायलाई आग्रह गरेको छ । संघले आज पत्रकार सम्मेलन गर्दै नेपाल दूरसञ्चार प्राधिकरणले गैरकानुनी रूपमा मोबाइल फोनहरूको आयात हुने समस्यालाई नियन्त्रण गर्न लागू गर्ने भनेको एमडिएमएस प्रणालीलाई व्यवस्थित तरिकाले अघि बढाउन संघले माग गरेको हो ।

एमडिएमएस लागू भए अवैध तरिकाले नेपाल भित्रिएका वा सिस्टममा दर्ता नभएका कुनै पनि मोबाइल फोन चल्दैन । उक्त प्रणालीको उचित व्यवस्थापन र कार्यान्वयन भएमा अपराध नियन्त्रणमा समेत यसले मद्दत पुग्ने संघको भनाइ छ ।

संघका अध्यक्ष दिनेश चुल्याद्योले भने 'एमडिएमएस प्रणाली छिटोभन्दा छिटो लागू हुनुपपर्यो । यो हाम्रो विरोध नभई अनुरोध हो,' उनले हाल नेपालमा वार्षिक ३८ देखि ४० अर्ब रुपैयाँको मोबाइल फोनको वैधानिक रूपमा आयात तथा कारोबार भएको जानकारी दिए । तर योसँगै करिब १४ अर्ब बराबरको अवैधानिक वा भन्सार नतिरी विभिन्न तरिकाले फोनहरूको कारोबार भएको देखिन्छ । यसलाई रोक्नकै लागि एमडिएमएस प्रणाली लागू हुन आत्यावश्यक छ,' उनले भने।

उनका अनुसार यसरी अवैध रूपमा भइरहेको मोबाइल फोनको कारोबारले सरकारले झन्डै वार्षिक दुई अर्बको हाराहारीमा राजस्व गुमाइरहेको छ । अवैध रूपमा भित्रिएका फोनहरूको बजारमा पार्ट्स नपाइने, फोन खरिदमा कुनै वारेन्टी नपाइनेदेखि कानुनी झमेलामा समेत पर्न सक्ने अवस्था आउँछ ।

त्यस्ता फोनको प्रयोगले नेपाल प्रहरीको अनुसन्धानमा समेत कठिनाई हुन्छ । संघका अनुसार आइएमइआई नम्बर दर्ता नभएका फोनको प्रयोगमा अपराधिक गतिविधिहरू धेरै भएको बुझिएको छ । भन्सार छलेर मोबाइल भित्र्याउँदा वैधानिक तरिकाले कारोबार गर्ने व्यापारीहरू भने मर्कामा परिरहेको संघको भनाइ छ ।

संघले एमडिएमएस लागू हुँदा वैदेशिक रोजगारी तथा अन्य सिलसिलामा गएका नेपाली नागरिकले ल्याउने वा पठाउने फोनमा कुनै समस्या नआउने पनि बताएको छ ।

सरकारले विदेशबाट आउनेहरूको हकमा भन्सार छुटमा मोबाइल फोन ल्याउन दिने र एमडिएमएस निःशुल्क दर्ता गर्न दिने हो भने यो समस्या पनि समाधान हुने संघका अध्यक्ष दिनेशको भनाइ छ ।