
Apr 05 2025 | २०८१, चैत २३ गते
काठमाडौँ। काठमाडौँको बिजुली बजारस्थित चक्रवर्ती ल कलेजमा आज बिहानैबाट तनावग्रस्त बनेको छ । कलेजले गतवर्ष ७ लाख १६ हजार रुपैयाँ रहेको बीएएलएलबी शैक्षिक सत्र २०७९/८० को शुल्क एकैपटक १० लाख ७० हजार पुर्याएपछि विद्यार्थीहरू आन्दोलनमा उत्रिएका हुन् ।
नेविसंघ र अखिलले संयुक्त रूपमा गरेको आन्दोलनका कारण कलेजमा तीन दिनदेखि पठनपाठन हुन सकेको छैन । कलेजमा विद्यार्थी र प्रहरीबीच झगडा भएको छ । झगडाको क्रममा कलेजमा अध्ययनरत विद्यार्थीहरू मनमोहन भट, अभिनव सिंह राठोर, सफल केसी र दिर्घ रोकाया घाइते भएका छन् । उनीहरूको सिभिल अस्पताल बानेश्वरमा उपचार भइरहेको छ ।
सोमवार कलेज व्यवस्थापन र विद्यार्थी प्रतिनिधिहरूबीच भएको वार्तामा कलेजले ५० हजार शुल्क घटाउने बताएको थियो । तर, विद्यार्थीहरूले पुरानै शुल्क कायम गरिनुपर्ने अडान राखेपछि वार्ता निष्कर्षविहीन भएको थियो । कलेज प्रशासनसँगको वार्ता सफल नभएपछि विद्यार्थीहरूले मंगलवार लेखा शाखामा तालाबन्दी गरेका थिए ।
उक्त ताला कलेज प्रशासनले फुटाएपछि स्थिति तनावपूर्ण बनेको थियो । विद्यार्थीहरूले क्याम्पसमा तोडफोडसमेत गरेपछि हस्तक्षेप गरिएको प्रहरीले बताएको छ ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij