गृह मन्त्रालयले एकजना प्रहरी अतिरिक्त महानिरीक्षक (एआईजी) र पाँचजना प्रहरी नायब महानिरीक्षक (डीआईजी)को दरबन्दी थप गरेको हो ।

काठमाडौँ । नेपाल प्रहरीमा एआईजी र डिआईजीको दरबन्दी थप गरिएको छ । गृह मन्त्रालयले एकजना प्रहरी अतिरिक्त महानिरीक्षक (एआईजी) र पाँचजना प्रहरी नायब महानिरीक्षक (डीआईजी)को दरबन्दी थप गरेको हो । गृह मन्त्रालयले पाँच वटा डीआईजीको दरबन्दी थप्नुपर्ने प्रस्ताव मन्त्रपरिषदमा पठाएको थियो । सरकारले प्रस्ताव स्वीकृत गर्नुका साथै सरकारले एक एआईजीको दरबन्दीसमेत थप गरेर स्वीकृत गरेको हो ।

हाल एआईजी बढुवा प्रतिष्पर्धाका लागि रानीपोखरीमा रहेका डीआईजी विश्वराज पोखरेल, केन्द्रीय अनुसन्धान ब्युरो सीआईबीका सहकुलबहादुर थापा र प्रदेश २ प्रहरी प्रमुख धीरजप्रताप सिंह दौडमा छन् । महानिरीक्षक शैलेश थापा क्षेत्रीको ब्याचका निरज शाही र प्रधुम्न कार्कीलाई एआईजीमा बढुवा गरेको थियो । उनीहरु एआईजी बनेपछि डीआईजीका तीन दरबन्दी खाली भएका थिए । अब थपिएका पाँचसहित ८ पदमा बढुवाको तयारी थालिएको छ । त्यसका लागि हालका आईजीपी शैलेश थापा क्षेत्रीकै ब्याचका देवबहादुर बोहाेरासहित गणेश ऐर, पुरुषोत्तम कँडेल, दिवेश लोहनी, दीलिप चौधरी, राजेशलाल कर्ण, सौरभ राणा र रामकृपाल शाह प्रतिष्पर्धामा छन् ।

त्यस्तै, उमेश रञ्जितकार, सुशीलकुमार यादव, मुकुन्द आचार्य, हरिराज वाग्ले, पूजा सिंह, विक्रम चन्द, नलप्रसाद उपाध्याय, देवबहादुर बोगटी, मोहन आचार्य, राजेन्द्र चौधरी, नरबहादुर खत्री र मोहमद आलम खाँ पनि बढुवाको आकांक्षी हुन् । प्रहरीमा हाल प्रशासनतर्फ १४ र प्राविधिक ८ गरी २२ जना डीआईजी छन् ।