काठमाडौं । शिक्षा, विज्ञान तथा प्रविधि मन्त्रालयले कोभिड(१९ को संक्रमण र त्यसवाट हुने जोखिमबाट शिक्षा क्षेत्रमा पर्ने असरबारे थप सावधानी अपनाउन आग्रह गरेको छ । आज (बिहीवार) शिक्षा, विज्ञान तथा प्रविधिमन्त्री कृष्णगोपाल श्रेष्ठको अध्यक्षतामा वसेको बैठकले कोरोनाबाट मुलुकभरका शिक्षक तथा विद्यार्थीको स्वास्थ्य र शिक्षण संस्थाका कृयाकलापमा पर्न सक्ने प्रतिकूल असरकाबारेमा सतर्कता अपनाउन आग्रह गरेको हो । सबै प्रकारका शिक्षण संस्थाहरूले स्वास्थ्य तथा जनसङ्ख्या मन्त्रालयले तय गरेका जनस्वास्थ्य र सुरक्षा सम्वन्धी मापदण्डका साथै प्रदेश सरकार र स्थानीय तहवाट स्थान विशेषमा तय गरिएका थप मापदण्डहरूको पूर्ण रूपमा पालन गर्न, शिक्षण संस्थाहरूमा मास्क तथा स्यानिटाइजरको प्रयोग गर्ने, सावुन पानिले हात धुने, ज्वरो नाप्ने र कसैमा संक्रमणको लक्षण पाइएमा नजिकको स्वास्थ्य संस्थामा सम्पर्क गर्ने व्यवस्थालाई प्रभावकारी बनाउन मन्त्रालयले अनुरोध गरेको छ ।

विज्ञप्तिमा शिक्षण संस्थाहरूमा सभा, समारोह, वार्षिक उत्सव जस्ता भीडभाड हुने प्रकृतिका कार्यक्रमहरूको आयोजना नगर्न नगराउन समेत सम्वद्ध सबैमा मन्त्रालयले आग्रह गरेको छ । विद्यालयहरूले दैनिक पठन पाठन सञ्चालन गर्दा भीडभाड नहुनेगरी गरी सञ्चालन गर्ने व्यवस्था मिलाउनुका साथै मन्त्रालयले जारी गरेको ‘विद्यालय सञ्चालन सम्वन्धी कार्यढाँचा, २०७७’को पूर्ण रूपमा अनुसरण गर्न र सो कार्याढाँचाको अधिनमा रही स्थानीय सरकारवाट निर्णय भएबमोजिम गर्न गराउन पनि अनुरोध गरेको छ ।

‘सो कार्यढाँचा यस मन्त्रालयको वेवसाइटवाट डाउनलोड गरी प्राप्त गर्ने सकिने व्यहोरा समेत सम्वन्धित सबैको जानकारीको लागि अनुरोध गरीएको’ विज्ञप्तिमा उल्लेख छ ।