वागमती प्रदेशका सांसद नरोत्तम वैद्य र अधिवक्ता निकिता ढुंगानाले रिट दायर गरेका हुन् ।

काठमाडौं । पशुपतिनाथ मन्दिरमा सुनको जलहरी राख्ने निर्णय कार्यान्वयन नगर्न माग गर्दै सर्वोच्च अदालतमा सोमवार रिट दायर भएको छ । वागमती प्रदेशका सांसद नरोत्तम वैद्य र अधिवक्ता निकिता ढुंगानाले रिट दायर गरेका हुन् । पुरातात्विक सम्पदा सम्बन्धि ऐन, विश्व सम्पदाको मापदण्ड र शैव दर्शनको मान्यता विपरित सुनको जलहरी राख्न लागिएको भन्दै उक्त निर्णय बदर गराउन माग गरिएको रीटमा प्रधानमन्त्री, मन्त्रीपरिषदको कार्यालय, संस्कृति मन्त्रालय र पशुपति क्षेत्र विकास कोषलाई विपक्षी बनाईएको छ ।

रिट निवेदनमाथि छलफलका लागि पर्सी बुधवार पेशी तोकिएको छ । सरकारले पशुपतिनाथभित्रको ज्योर्तिलिङ्गमा एक अर्ब रुपैयाँ भन्दा बढी लगानीमा १ सय ८ किलोको सुनको जलहरी राख्ने निर्णय गरेको थियो । त्यसका लागि क्षमापूजा समेत गरिसकेको छ ।