Apr 05 2025 | २०८१, चैत २३ गते
Apr 05 2025 | २०८१, चैत २३ गते
काठमाडौं । प्रहरीले एक केजीभन्दा बढी अवैध सुन र नगदसहित पक्राउ परेका ७ जनालाई सार्वजनिक गरेको छ । उपत्यका अपराध अनुसन्धान कार्यालयले शुक्रबार पत्रकार सम्मलेन गर्दै सार्वजनिक गरेको हो ।
काठमाडौं उपत्यका अपराध अनुसन्धान कार्यालयको टोलीले शुक्रबार बिहान डेढ किलोभन्दा केही बढी सुन र झन्डै डेढ करोड रूपैयाँसहित पक्राउ गरेको थियो ।
काठमाडौं महानगरपालिका–२४ दुछेंननी टोलमा केही व्यक्तिले अवैध सुनको कारोबार गरिरहेका सूचनाको आधारमा प्रहरी टोलीले खोजी गर्दा उनीहरूलाई पक्राउ गरेको हो ।
उनीहरूको साथबाट १ किलो ७ सय ६८.२५ ग्राम सुन र १ करोड ४३ लाख ६० हजार रूपैयाँ बरामद भएको प्रहरीले जनाएको छ ।पक्राउ पर्नेमा चार नेपाली र ३ भारतीय नागरिक छन् ।
प्रहरीका अनुसार पक्राउ परेकाहरूमा दार्चुलाको महाकाली नगरपालिका-३, टाँटेका ४७ वर्षिय गणेश दत्त बडु, झापाको बिर्तामोड नगरपालिका-३ का ३० वर्षीय दिनेश खरेल, दार्चुला टाटे नगरपालिका-३ का २१ वर्षीय आयुष बहु, झापाको बिर्तामोड नगरपालिका-३ का २२ वर्षीय भातराज खोल छन् ।
यस्तै, भारतको महाराष्ट्र राज्यको सांगली आटपाडी थानाका ३७ वर्षीय अमोल विभूत, सोही स्थानका १८ वर्षीय ऋषिकेश प्रकाश विभूते र १८ वर्षीय गणेश सतिश वाल्टे छन् ।
घटनाबारे प्रहरीले थप अनुसन्धान गरिरहेको प्रहरीले जनाएको छ ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
