Apr 06 2025 | २०८१, चैत २४ गते
Apr 06 2025 | २०८१, चैत २४ गते
काठमाडौँ । चिकित्सकलाई कुटपिट गरेको विरोधमा मकवानपुरको हेटौंडाका स्वास्थ्य संस्थामा आकस्मिक बाहेकका सेवा बन्द गरिएको छ । हेटौंडाको सन्चो अस्पतालका दुई जना चिकित्सकलाई कुटपिट गरिएको विरोधमा स्वास्थ्यकर्मीले आकस्मिक बाहेकका सेवा बन्द गरेका हुन् ।
शुक्रबारदेखि हेटौंडाका निजी तथा सरकारी अस्पताल, मेडिकल तथा क्लिनिकले सेवा बन्द गरेका हुन् । कुटपिटमा संलग्न व्यक्तिलाई कारबाहीको माग गर्दै उनीहरू विरोधमा उत्रिएका हुन् । स्वास्थ्यकर्मीले घटना भएको तीन दिन बितिसक्दा पनि कारबाहीको प्रक्रिया अघि नबढेकाले आन्दोलनमा उत्रिनुपरेको बताएका छन् ।
चिकित्सकलाई कुटपिट गर्नेलाई कारबाही गर्नुको सट्टा स्थानीय प्रशासन र प्रहरीले मिलापत्र गराउन खोजेपछि स्वास्थ्यकर्मी आक्रोशित छन् । डेंगीको उपचारका लागि आएका हेटौंडा उपमहानगरपालिका–१२ का राजेश प्रधानलाई गत साउन २५ मा चितवन रिफर गरिएको थियो । उनको चितवनमा उपचारका क्रममा मृत्यु भएको थियो।
चिकित्सकले उपचारमा लापरबाही गरेको भन्दै एक महीनापछि चिकित्सकद्वय डा. प्रशान्त बिडारी र डा. विकास थापालाई कुटपिट गरेका हुन् । कुटपिटमा संलग्न भएको आरोपमा प्रहरीले चार जनालाई पक्राउ गरेको छ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
