Apr 05 2025 | २०८१, चैत २३ गते
Apr 05 2025 | २०८१, चैत २३ गते
काठमाडौं । हत्या आरोपमा बैतडी प्रहरीले एकजनालाई पक्राउ गरेको छ । पक्राउ पर्नेमा जिल्लाको मेलौली नगरपालिकाका ४४ वर्षीय गोरख दयाल रहेका छन् ।
दयाललाई डडेल्धुराको भागेश्वर गाउँपालिका–३ लामीकाँडेकी ३६ वर्षीया गीतादेवी मल्लको हत्या आरोपमा पक्राउ गरिएको हो । विसं.२०७८ साल साउन ८ गते बैतडीको मेलौली नगरपालिका–५ सेरी माइती घर आउँदै गरेकी गीता मेलौली नगरपालिका–७ ल्वाथलीमा मृत अवस्थामा फेला परेकी थिइन् ।
त्यसपछि अनुसन्धान गर्दा घटनामा गोरखको संलग्नता रहेको आशंकामा गोरखलाई पक्राउ गरिएको बैतडीका प्रहरी प्रवक्ता, प्रहरी निरीक्षक योगेश खत्रीले जानकारी दिए । उनले भने, ‘गीतादेवी मृत्युभन्दा पहिला गोरखको सम्पर्कमा आएको खुल्न आएकोले हामीले समातेका हौं ।’
गोरखले गीताको शव आफूले फालेको भनेर प्रहरीसमक्ष बयान दिएका प्रवक्ता खत्रीले बताए । उनले भने, ‘गोरखले हामीसमक्ष गीताको शव आफूले नै फालेको भनेर बयान दिएका छन् । अनुसन्धानकै क्रममा छौं । सबै कुरा खुलेको छैन ।’
गीतालाई मारेर फालेको हो अथवा अन्य केही कारण हो भन्ने विषयमा खुल्न बाँकी छ । गोरखविरुद्ध ज्यानसम्बन्धी मुद्दा दर्ता भएर थप अनुसन्धान भइरहेको जिल्ला प्रहरी कार्यालय बैतडीले जनाएको छ ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
