काठमाडौं । गाजा पट्टीभर गरिएको इजरायली हवाई र ड्रोन आक्रमणमा कम्तीमा २५ प्यालेस्टिनी  मारिएको गाजा स्वास्थ्य मन्त्रालयले जनाएको छ । हमासद्वारा सञ्चालित मन्त्रालयका अनुसार गाजा सिटीको पूर्वी जेतौन क्षेत्रमा अवस्थित धार्मिक मामिलासम्बन्धी मन्त्रालयको भवनमा भएको प्रहारमा एक महिला र एक बालिकासहित १० जनाको मृत्यु भएको बीबीसीले उल्लेख गरेको छ ।

इजरायली सेनाले भने दक्षिणी शहर खान युनिसमा आफ्ना सैनिकमाथि गोली प्रहार भएको दाबी गर्दै हमासमाथि कारबाही गरिएको जनाएको छ । यो घटनाले पाँच हप्तादेखिको युद्धविराम सम्झौताका शर्त उल्लङ्घन गरेको बताइएको छ । हमासले भने यसबारे तत्काल कुनै प्रतिक्रिया दिएको छैन ।

यसैबीच, संयुक्त राष्ट्र सुरक्षा परिषद्ले अमेरिकी राष्ट्रपति डोनाल्ड ट्रम्पको गाजा शान्ति योजना अनुमोदन गरेपछि सुरु भएको यो तनावले पछिल्ला केही दिनदेखि देखिएको शान्त स्थितिलाई भंग गरेको स्थानीय अधिकारीहरूले बताएका छन् । गाजा सिटी र खान युनिसका विभिन्न स्थानमा गरिएको हवाई आक्रमणमा दर्जनौँ भवन क्षतिग्रस्त भएको गाजा सिभिल डिफेन्सका प्रवक्ता महमूद बस्सालले बीबीसीलाई बताए ।

जेतौन क्षेत्र रहेको धार्मिक मन्त्रालयको भवनमा भएको प्रहारपछि उद्धारकर्मीहरूले भग्नावशेषमुनि पुरिएका दुई जनालाई भेटिएको भिडियो समेत सार्वजनिक गरिएको छ । आनादोलु समाचार एजेन्सीले घटनास्थलबाट फेला परेका तीन बालबालिकाका शवहरूका तस्वीरहरू प्रकाशित गरेको छ ।

गाजा सिटीको शेजाइया क्षेत्रमा मुख्य सडक सलाह अल(दिन नजिक गरिएको ड्रोन आक्रमणमा एक जनाको मृत्यु र कयौँ घाइते भएका छन् । त्यस्तै, त्यही क्षेत्रमा बालबुल परिवारको घरमा भएको ट्यांक प्रहारमा एक जनाको मृत्यु भएको अधिकारीहरूले जनाएका छन् ।
खान युनिसमा भने संयुक्त राष्ट्रको शरणार्थी निकायद्वारा सञ्चालित खेलकुद क्लबमा भएको आक्रमणमा तीन जनाको मृत्यु भएको छ ।

खान युनिसमा इजरायली सैनिकतर्फ केही आतंककारीहरूले गोली हानेपछि जवाफी कारबाहीस्वरूप गाजाभर हमासका सैन्य क्याम्पमाथि प्रहार गरिएको इजरायली सेनाले जारी गरेको वक्तव्यमा उल्लेख छ । सो आक्रमणमा हमासको जेतौन बटालियनका कमाण्डर र नौसैनिक इकाईका प्रमुखसमेतलाई लक्षित गरिएको थियो ।

सोमबार संयुक्त राष्ट्र सुरक्षा परिषद्ले युद्धविरामलाई मजबुत पार्ने उद्देश्यसहित ट्रम्पको गाजा योजना पारित गर्दै ‘बोर्ड अफ पीस’ नामक अन्तरिम शासकीय संरचना र ‘इन्टरनेशनल स्ट्याबिलाइजेशन फोर्सु (क्ष्क्ँ) गठनको अनुमति दिएको थियो । हमासले भने हतियार त्याग्ने सम्भावना नदेखाउँदै  आफ्नो संघर्ष वैध प्रतिरोध भएको दाबी दोहोर्‍याएको छ ।  

७ अक्टोबर २०२३ मा दक्षिणी इजरायलमाथि हमासले गरेको आक्रमणमा करिब १२०० जनाको मृत्यु र २५१ जनालाई बन्धक बनाइएपछि इजरायलले गाजामा ठूलो सैन्य कारबाही सुरु गरेको थियो । त्यसपछि गाजामा कम्तीमा ६९ हजार ५०० जनाको मृत्यु भएको गाजाको स्वास्थ्य मन्त्रालयले जनाएको छ । युद्धविराम अवधिमा मात्र २८० जनाको मृत्यु भएको बताइएको छ ।