निर्मला हत्याकाण्डको अनुसन्धानमा खटिएर सरुवा भइसकेका एक उच्च अधिकारी भन्छन्, “निर्मला हत्याकाण्डको अनुसन्धान जटिल छ । सुरुदेखि नै अनुसन्धानमा केही त्रुटि भयो ।”

काठमाडौं । हत्यारासम्म पुग्ने ‘क्लु’ फेला नपर्दा कञ्चनपुरकी १३ वर्षीया किशोरी निर्मला पन्तको हत्याकाण्डको अनुसन्धानमा प्रहरी निराश बन्दै गएको छ । ‘म्यान्युअल’ रूपमा अनुसन्धान गर्नुपर्ने बाध्यता र घटना भएको तीन वर्षसम्म पनि ‘क्लु’ फेला नपर्दा प्रहरी निराश बन्दै गएको हो ।

कञ्चनपुरको भीमदत्त नगरपालिका–२ की १३ वर्षीया निर्मला ०७५ साउन ११ गते घरभन्दा केही पर रहेको उखुबारीमा मृत अवस्थामा फेला परेकी थिइन । उनको बलात्कारपछि हत्या भएको खुलेको थियो । निर्मला हत्या प्रकरणमा प्रहरी अनुसन्धानसमेत विवादमा परेको थियो । प्रहरीले अनुसन्धानमा क्रममा ७० जना बढीको डीएनए परीक्षणसमेत गरिसकेको छ । तर, कसैको पनि डीएनए निर्मलाको शरीरबाट निकालिएको स्वाबसँग मेल खाएन ।

हालसम्म एक दर्जनभन्दा बढी टोलीले निर्मला प्रकरणबारे अनुसन्धान गरिसकेका छन् । सुरुदेखि नै अनुसन्धानमा अब्बल मानिएको प्रहरीको केन्द्रीय अनुसन्धान ब्युरो (सीआईबी) को टोली समेत कञ्चनपुरमै कार्यरत छ ।

तर, अभियुक्तसम्म पुग्ने सूचना प्राप्त गर्न प्रहरी असफल छ । निर्मला हत्याकाण्डको अनुसन्धानमा खटिएर सरुवा भइसकेका एक उच्च अधिकारी भन्छन्, “निर्मला हत्याकाण्डको अनुसन्धानमा ठूलो स्रोत–साधन परिचालन गरिएको छ । तर, अनुसन्धान जटिल छ । क्लुकै अभाव छ । सुरुदेखि नै अनुसन्धानमा केही त्रुटि भयो । त्यसैले यो प्रकरण निष्कर्षमा पुर्‍याउन गाह्रो देखिन्छ ।”

हालसम्म प्रहरीले एक हजार बढी शंकास्पदसँग बयान लिइसकेको छ । अनुसन्धानबारे प्रहरी अधिकारीहरुकै मत पनि बाझिदै आएका छन् । घटनास्थल उखुबारी नै हो वा अन्यत्र, हत्या आकस्मिक थियो वा पूर्वयोजनामै थियो भन्नेमा पनि प्रहरी टोली अन्योलमा देखिन्छ ।

एक अधिकारी भन्छन्, “निर्मलाले मोबाइललगायत सामग्रीको प्रयोग गर्ने गरेको भए अनुसन्धानमा सहजता हुन सक्थ्यो । प्राविधिक रूपमा पनि हामीले धेरै कुरा हेरेका छौँ । शंकास्पदलाई ल्याएर सोधपुछ निरन्तर गरिरहेकै छौँ । तर, सफल हुन सकिएको छैन ।” - बाह्रखरी

अनुसन्धानमा खटिएका प्रहरी अधिकारीहरुले अनुसन्धानमा पर्याप्त मात्रामा स्रोत–साधनको समेत कमी भएको गुनासो गर्दै आएका छन् । सुराकी परिचालन, सूचना संकलनमा आर्थिक अभाव भएको उनीहरुको गुनासो रहँदै आएको छ ।