Jun 04 2026 | २०८३, जेठ २१ गते
Jun 04 2026 | २०८३, जेठ २१ गते
काठमाडौं । अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी) बागमती प्रदेश समितिले पछिल्लो समय विद्यालयहरूमा डोजर प्रयोग गरी भौतिक संरचना भत्काइएको घटनाप्रति गम्भीर आपत्ति जनाएको छ।
शनिबार जारी प्रेस वक्तव्यमा संगठनले केही दिनयता काठमाडौं महानगरपालिकाले विभिन्न स्थानमा डोजर चलाउँदै आएको उल्लेख गर्दै यसले जनतामा त्रास सिर्जना गरेको आरोप लगाएको हो ।
विशेषगरी सरस्वती आधारभूत विद्यालय, मध्यपुर थिमीमा बिना सूचना तथा वैकल्पिक व्यवस्था विद्यालय भत्काइएको र त्यसपछि बुद्धज्योति बाल उद्यम आधारभूत विद्यालय, काठमाडौं महानगरपालिका–१९, बालाजुस्थित विद्यालयमा पनि यस्तै कार्य दोहोरिएकोप्रति ध्यानाकर्षण भएको जनाएको छ।
संगठनले यस्ता गतिविधिले विद्यार्थीहरूमा त्रास फैलाएको, उनीहरूको पढाइ अवरुद्ध भएको तथा बालबालिकाको मनोविज्ञानमा नकारात्मक असर परेको दाबी गरेको छ। साथै, सयौं विद्यार्थी शिक्षा प्राप्त गर्नबाट वञ्चित भएको उल्लेख गर्दै यसप्रति खेद प्रकट गरिएको छ।
प्रेस वक्तव्यमा प्रभावित विद्यार्थीहरूको वैकल्पिक अध्ययन व्यवस्था तत्काल मिलाउन, आधारभूत आवश्यकताहरू सुनिश्चित गर्न तथा भविष्यमा बिना तयारी यस्ता गतिविधि नगर्न सरकारसँग माग गरिएको छ। अन्यथा यस्ता कदम दोहोरिएमा कडा संघर्षमा उत्रने चेतावनी दिइएको छ।
संगठनका बागमती प्रदेश संयोजक हस्त बि.क.द्वारा जारी वक्तव्यमा विद्यार्थी अधिकारको संरक्षणका लागि सबै विद्यार्थी तथा आम नागरिकलाई प्रतिरोधमा उत्रन आह्वान समेत गरिएको छ।
© 2026 All right reserved to onlinepatrika.com | Site By : Sobij
© 2026 All right reserved to onlinepatrika.com | Site By : Sobij
