Apr 05 2025 | २०८१, चैत २३ गते
Apr 05 2025 | २०८१, चैत २३ गते
काठमाडौं। निर्वाचन जितेलगत्तै नगरबाट कुनै पनि सेवा सुविधा नलिने घोषणा गरेका बर्दिवास नगपालिकाका मेयर प्रल्हादकुमार क्षेत्रीले आफ्नो तलबभत्ता रेडक्रसको रक्तसञ्चारलाई प्रदान गरेका छन् । उनले आफ्नो कार्यकालमा नगरबाट खातामा जम्मा भएको ७ लाख ७७ हजार ७७७ रुपैयाँ क्षेत्रीले रक्तसञ्चार केन्द्र बर्दिवासलाई उपलब्ध गराएका हुन् । क्षेत्री दम्पत्तीले आफ्नो २५औँ वैवाहिक उत्सवको सन्दर्भमा रेडक्रस उपशाखा बर्दिवासका सभापति रेवन्त कार्कीलाई उक्त रकमको चेक हस्तान्तरण गरेका नगरपालिकाका प्रवक्ता विजयकुमार महतोले जानकारी दिए ।
बिरामी र दुर्घटनामा परेका व्यक्तिलाई समयमै रगत उपलब्ध गराउन र रक्तदान कार्यक्रममा संकलन गरिएको रगत सवारी अभावले बिग्रने गरेको भन्दै रेडक्रसले रक्तसञ्चारका लागि सवारी खरिद गर्न नगरसँग सहयोग माग गरेको महतोले बताए ।
दान गरिएको रगत खेर जान नदिन र रगत अभावमै कसैले पनि अकालमै ज्यान गुमाउनपर्ने दुःखद् अवस्थाको अन्त्य गर्न आफूले उक्त रकम रक्तसञ्चारलाई दिएको मेयर क्षेत्रीले बताए ।
नगरको सेवा सुविधा नलिने आफूले घोषणा गरेको बोलीमा प्रतिबद्ध रहेको भन्दै क्षेत्रीले खातामा रहेको अन्य रकम र जम्मा हुने अन्य तलब भत्ता पनि नगरभित्रै अन्य सामाजिक कार्यमा सहयोग गर्ने बताए ।
मेयर क्षेत्री र श्रीमती मन्जुले चेक हस्तान्तरण गर्दै आफ्नो वैवाहिक खुसीसँगै अन्य खुसीका क्षणमा समेत सामाजिक कार्यमा निरन्तर सहयोग गर्ने बताएका छन् । नगरको सेवा सुविधा नलिने घोषणा गरेका क्षेत्री आफ्नै निजी सवारी प्रयोग गर्छन् ।
© 2025 All right reserved to onlinepatrika.com | Site By : Sobij
© 2025 All right reserved to onlinepatrika.com | Site By : Sobij
