Jun 04 2026 | २०८३, जेठ २१ गते
Jun 04 2026 | २०८३, जेठ २१ गते
काठमाडौँ । प्रत्येक वर्ष फागुन शुक्ल पूर्णिमाको दिन मनाइने फागुपूर्णिमा होली पर्व आज देशभरका पहाडी भेगमा विभिन्न कार्यक्रमको आयोजना गरी मनाइयो । होलीको अवसरमा हुने विभिन्न किसिमका अमर्यादित गतिविधि रोक्नको लागि यसवर्ष सुरक्षा निकायले विशेष किसिमको सुरक्षा रणनीति अपनाएको थियो ।
महानगरीय ट्राफिक प्रहरी महाशाखाले होली मनाउँदा ट्राफिक नियम तोड्ने खालका अमर्यादित कार्य नियन्त्रण गर्न काठमाडौँ उपत्यकाभर मात्र एक हजार तीन सय भन्दा बढी सुरक्षाकर्मी खटाइ ट्राफिक व्यवस्था कडा बनाएको थियो ।
बितेका दुई वर्षमा कोरोना भाइरसका कारण होली मनाउन प्रतिबन्ध लगाएको भएपनि त्यस अघिका वर्षमा दुर्घटना अधिक मात्रामा दुर्घटना भएको पाइन्थ्यो । २०७५ सालमा होली मनाउँदा २२ ओटा सवारी साधन दुर्घटना भएका थिए । काठमाडौँ उपत्यकामा मात्रै १० ओटा सवारी दुर्घटना भइ १८ जना घाइते भएका थिए भने ३ जनाएको ज्यान गएको थियो ।
यसवर्ष भने बिगतका वर्षहरुमा भन्दा सुरक्षा व्यवस्था कडा गरिएको कारण कुनैपनि अप्रिय घटना हुन नपाएको महानगरीय ट्राफिक महाशाखाका प्रवक्ता प्रहरी उपरीक्षक संजिव शर्मा दासले जानकारी दिए । उनका अनुसार हालसम्म ४९९ ओटा सवारी साधन नियन्त्रण गरिएको छ । जसमध्ये २९ ओटा सवारी साधन मापसे र बाँकी कागजपत्र तथा अन्य कारणले नियन्त्रण गरिएको हो ।
यता, ललितपुरको सातदोबाटोमा पनि ट्राफिकले दुर्घटना हुन नदिनको लागि सुरक्षा व्यवस्था कडा पारेको थियो । महानगरीय प्रहरी परिसर सातदोबाटोका प्रमुख प्रहरी निरीक्षक नरेशबहादुर शाहीका अनुसार आज कुनैपनि किसिमको अप्रिय घटना भएन । आज २०९ ओटा सवारी साधन कार्वाहिमा परेका छन् । जसमा ६१ ओटा सवारी साधन नियन्त्रणमा रहेका छन् ।
© 2026 All right reserved to onlinepatrika.com | Site By : Sobij
© 2026 All right reserved to onlinepatrika.com | Site By : Sobij
