'कोरोनाबाट सतर्क हुनुस् भनेर अहोरात्र खटिएँ', ट्राफिक प्रहरी परिसर ललितपुरका प्रमुख तथा इन्स्पेक्टर नरेश शाहीले आइतबार दिउँसो अनलाइन पत्रिकासँग कुरा गर्दै भने, ‘अहिले पारिवारिक सदस्यमा संक्रमण देखिएको हुनाले म घरमै आइसोलेसन बसेको छु ।’ 

ललितपुर । महानगरिय ट्राफिक प्रहरी परिसर ललितपुरका प्रमुख तथा इन्स्पेक्टर नरेश शाही आइसोलेसन बसेका छन् । परिवारका सदस्यमा कोरोना संक्रमण देखिएपछि इन्स्पेक्टर शाही घरमै आइसोलेसन बसेका हुन् ।

शाहीले सातदोबाटोमा ट्राफिक प्रहरीको कमाण्ड लिएदेखि नै जनतालाई सडक सुरक्षा र कोरोना सतर्कताबारे सन्देश फैलाउन सक्रिय बनेका थिए । इन्स्पेक्टर शाहीले भर्खरै पनि 'तपाईँको मास्क खैँ ?' र 'नो हर्न' अभियानबाट ललितपुरवासीको वाहवाही पाएका थिए । 

ठूला मालवाहक गाडी, निर्माण सामाग्री बोकेका गाडी र ट्रिपरहरुलाई 'लेप लेन' को बिस्तारपनि इन्स्पेक्टर शाहीले नै गरेका थिए । जसकारण ललितपुरमा सवारी दुर्घटना घटेको तथ्याङ छ । बालकुमारीदेखि बल्खुसम्मको एरियामा ठूला मालवाहक गाडी अहिले 'लेप लेन' मा गुड्नुपर्ने नियमलाई कडाई पारिएको छ । 

ग्वार्काेको अत्याधिक सवारीजामलाई पनि शून्य पारेका इन्स्पेक्टर शाहीले ग्वार्काेको व्यस्त सडकमा पार्किङमा कडाई गर्दै आइरहेका छन् । ट्राफिक प्रहरीको सुझबुझले अहिले ग्वार्काेमा सवारी जाम न्यून हुँदै गएको स्थानीयले बताए । इन्स्पेक्टर शाहीकै पहलमा चापागाउँ दोबाटो र महालक्ष्मीस्थान चोकमा आईलैण्ड राखियो । 

'कोरोनाबाट सतर्क हुनुस् भनेर अहोरात्र खटिएँ', इन्स्पेक्टर शाहीले आइतबार दिउँसो अनलाइन पत्रिकासँग कुरा गर्दै भने, ‘अहिले पारिवारिक सदस्यमा संक्रमण देखिएको हुनाले म घरमै आइसोलेसन बसेको छु ।’