एपीएफले खेलभरि गोलका थुप्रै अवसर सिर्जना गर्यो तर फिनिसिङमा निरन्तर चुकेको थियो । पहिलो हाफको ४४औँ मिनेटमा मणि कुमार लामाको डिबक्सभित्रबाट गरेको सशक्त प्रहार पोस्टमाथिबाट बाहिरियो । दोस्रो हाफमा एपीएफ थप आक्रामक देखिए पनि गोलरक्षक दीप कार्कीको उत्कृष्ट बचाउ र आफ्नै फिनिसिङ त्रुटिले उसलाई बराबरी गर्न दिएन ।
५०औँ मिनेटमा प्रदीप लामाको कडा प्रहारलाई दीप कार्कीले रोके । ६३औँ मिनेटमा सविन गुरुङले गोलको सुनौलो मौका गुमाए। यता चर्च ब्वाइजले पनि ६९औँ मिनेटमा सुरज गौतमको प्रहार पोस्टमा लागेर फर्किँदा अग्रता दोब्बर पार्ने अवसर खेर फाल्यो ।
२०७८ सालको विजेता एपीएफ (जसले त्यतिबेला भारतीय टोली पन्जाब पुलिसलाई हराएर उपाधि जितेको थियो) यसपटक भने पहिलो खेलबाटै प्रतियोगिताबाट बाहिरिएको छ । उपाधि होडको मुख्य दाबेदार मानिएको टोलीले आधा दर्जनभन्दा बढी स्पष्ट अवसर सदुपयोग गर्न सकेन । यो जितसँगै चर्च ब्वाइज सेमिफाइनल पुग्ने दोस्रो टोली बनेको छ । यसअघि उद्घाटन खेलमा झापा ११ ले त्रिभुवन आर्मी क्लबलाई २–१ ले हराउँदै अन्तिम चारमा स्थान बनाइसकेको छ ।
प्रतियोगिताअन्तर्गत सोमबार तेस्रो क्वार्टरफाइनलमा नेपाल पुलिस क्लब र २०८० सालको विजेता मछिन्द्र फुटबल क्लबबीच प्रतिस्पर्धा हुनेछ ।
