Jun 04 2026 | २०८३, जेठ २१ गते
Jun 04 2026 | २०८३, जेठ २१ गते
काठमाडौं । नेपाल टेलिकमका दुई ठूला कर्मचारी संगठनहरूले निमित्त प्रबन्ध निर्देशक नियुक्तिको विषयलाई लिएर आपत्ति जनाएका छन् ।
नेपाल दूरसंचार राष्ट्रिय कर्मचारी संगठन र नेपाल राष्ट्रिय कर्मचारी संगठनले बिहीबार संयुक्त प्रेस विज्ञप्ति जारी गर्दै प्रचलित विनियमावली र विधिलाई मिचेर गरिएको नियुक्तिप्रति ध्यानाकर्षण भएको जनाएका हुन् ।
कम्पनीकी निमित्त प्रबन्ध निर्देशक सविना मास्के प्रधान उमेर हदका कारण यही माघ २१ बाट अनिवार्य अवकाशमा गएपछि रिक्त सञ्चार मन्त्रालयले माघ २३ गते अर्को कर्मचारीलाई निमित्तको जिम्मेवारी तोकेको थियो ।
कर्मचारी संगठनहरूले उक्त नियुक्ति नेपाल दूरसञ्चार कम्पनी लिमिटेड कर्मचारी सेवा शर्त विनियमावली विपरीत रहेको दाबी गरेका छन् ।
कुनै कार्यालय प्रमुखको पद रिक्त रहेमा सोही कार्यालयको सबैभन्दा वरिष्ठ कर्मचारीले निमित्त भई काम गर्नुपर्ने स्पष्ट व्यवस्था हुँदाहुँदै वरिष्ठतम कर्मचारीलाई पन्छाएर अर्कैलाई जिम्मेवारी दिँदा कम्पनीमा गलत नजिर बस्ने र आन्तरिक व्यवस्थापनमा अराजकता निम्तने कर्मचारी संगठनहरूको निचोड छ ।
निर्वाचन आचारसंहिता समेत लागू रहेको समयमा विगतको परम्परा र विनियमावली प्रतिकूल हुने गरी गरिएको निर्णयले कानुनी र नैतिक प्रश्न उठाएको विज्ञप्तिमा उल्लेख छ । विज्ञप्तिमा नेपाल दूरसञ्चार राष्ट्रिय कर्मचारी संगठनका महासचिव गोविन्द ढुंगाना र नेपाल राष्ट्रिय कर्मचारी संगठनका सचिव वेदप्रसाद पौडेलले हस्ताक्षर गरेका छन् ।
© 2026 All right reserved to onlinepatrika.com | Site By : Sobij
© 2026 All right reserved to onlinepatrika.com | Site By : Sobij
