‘नेता बोक्ने सहकारी धेरै छन्’

loading...

अनलाईन पत्रिकाका लागि सुविन श्रेष्ठले गरेको सम्वादको सम्पादित अंश

शशीकुमार लम्साल
सहकारी अधिकृत
डिभिजन सहकारी कार्यालय, ललितपुर

१. ललितपुरमा सञ्चालित सहकारीहरूको समग्र अवस्था कस्तो छ ?

– ललितपुरमा सहकारीहरू राम्रैसँग सञ्चालित छन् । ९ सय ४० सहकारीमध्ये केही सहकारीका कारण सबैलाई अप्ठ्यारोसमेत परेको अवस्था छ । निक्षेपकर्ताले अन्य सहकारीलाई पनि शंकामा राखेको स्थिती छ । हामी जिल्ला संघ र बचत संघहरूसँग समन्वय गरेर अधिकाशं सहकारी निरिक्षण र अनुगमनमा पुगेका छौं । सामान्य त्रुटीभन्दा बाहेक ठूला गल्ती भेट्टाएका छैनौं ।

२. सामान्य गल्तीमा छुट हो ?

– त्यसो होईन । सबै सहकारी संस्थाहरूको सम्पूर्ण लेखा विवरण परिक्षण गर्नु ज्यादै गाह्रो कुरा हो । तरपनि उजुरीका आधारमा सकेसम्म कारोबारको गहिराईमा पुग्ने गरेका छौं ।

ललितपुरमा सञ्चालित सहकारीविरूद्ध परेको उजुरी जोगाउन पार्टीका नेताहरूको पावर लगाएर प्रशासन, प्रहरी र हामीलाई समेत दबाब आउने गरेको छ ।

३. नाम चलेका सहकारीहरू डुब्दैछन्, त्यसबारे उजुरी आएको छैन ?

– यसलाई दुई हिसाबले हेर्न सकिन्छ । एउटा बजारबाट पैसा संकलन गरेर बजारमै लगानी गर्ने सहकारी । अर्काे व्यवस्थापनका प्रमुखले संकलित निक्षेपलाई मनोमानी गर्ने सहकारी । कर्मचारी र व्यवस्थापक आफैं बदमास भएरपनि सहकारी डुबेको अवस्था छ । पहिला सहकारीको अनुगमनमा सिस्टमभन्दा बाहिरबाट लगानी, खाटापाटा भद्रगोल र नियमित हर–हिसाब लुकाउने सहकारीको पहिचान गर्ने हो । त्यसपछि कारवाहीको प्रक्रियामा लगिन्छ ।

४. सहकारी बदमास देखियो भने कस्तो कारवाही हुन्छ ?

– समन्वयका कारणले कारवाही प्रक्रियामा कमजोरी आएको छ । सहकारीविरूद्ध उजुरीपछि प्रशासनलाई पत्र लेख्छौं । प्रशासनले प्रहरीलाई लेख्छ । फेरि पत्र हामीलाई आउँन्छ । यो प्रवृतिले बदमास सहकारी उम्किन सक्छन् ।

५. उम्किने सक्ने आधार बनाउनुतर्फ आर्थिक मिलेमत्तोको शंकापनि देखिन्छ नी ?

– त्यस्तै हल्लाका कारणले मैले प्रशासनमा एउटा प्रस्ताव राखे । प्रशासनको सहायक सिडिओको अध्यक्षतामा चाँडै एउटा कमिटि बनाउँदैछौ । कमिटिमा मलगायत प्रहरी परिसरबाट एकजनाको सहभागीता रहनेछ । कमिटिमा सहकारी बदमास देखिए सिधै कारवाहीको सिफारिस गर्ने र छिट्टै छिनोफानो निर्णयनिहित हुन्छ । अहिले पार्टीका नेता, युनियन र पावरवाला बोक्ने सहकारीहरूको जगजगी छ ।

६. बदमास सहकारी कसरी पहिचान गर्ने ?

– उजुरी आएको सहकारीको चारखाता, लेखाको खाटापाटा हेर्न, कस्तो कस्तो डिपोजिट आएको छ हेर्न । ऋण दिँदाको प्रक्रिया हेर्नलगायतका छन् । प्रमुखको प्रोफाइलबाट पनि बदमाश सहकारीको पहिचान हुन्छ । धेरै सहकारीले आफैलाई सुधार्नुपर्ने आवश्यक छ ।

तस्वीरः प्रजित तम्राकार

तपाईंको प्रतिकृया
Loading...